আশাবোৰ ভাষা হোৱাহেঁতেন
___________________________
আশাবোৰ ভাষা হোৱাহেঁতেন
চাল্লা লিখিয়েই পেলালোহেঁতেন,
কুমলীয়া বা তপত শব্দৰ
আখল পাতিলোহেঁতেন ।
আশাবোৰক ভাষা কৰি
উজাই-ভটিয়াই
ভটিয়াই-উজাই
পাগুলি-পাগুলি,
অভিধানৰ অভিমন্যু বেহুৰ পৰা
টানি-আজুৰি
ঠেলি-হেচুকি
গতিয়াই-লঠিয়াই অনা,
কমাৰশালত পিটি পিটি চিধা কৰা,
এটা এটা অনুভৱৰ শব্দৰে
নিপোটল কবিতা এটাৰ বুকুত
সাতোৰঙী সাজ পিন্ধালোহেঁতেন ।
মোৰ আশাবোৰক
কবিতাৰ ভাষা দিলোহেঁতেন ।
চাল্লা আশাবোৰ ভাষা হোৱাহেঁতেন ।।
Comments
Post a Comment